Cinetollywood

రిపబ్లిక్

నటులు:సాయితేజ్,ఐశ్వ‌ర్యా రాజేశ్‌,జ‌గ‌ప‌తిబాబు,ర‌మ్య‌కృష్ణ‌,రాహుల్ రామ‌కృష్ణ‌,బాక్స‌ర్ దిన‌దర్శకుడు: దేవ కట్టా

‘వెన్నెల‌’ అనే చిత్రంతో ప్రేక్ష‌కుల్ని ఎంట‌ర్‌టైన్ చేసి ద‌ర్శ‌కుడిగా మంచి గుర్తింపు తెచ్చుకున్న దేవ‌క‌ట్టా త‌ర్వాత ‘ప్ర‌స్థానం’ చిత్రంతో అందరి దృష్టిని ఆక‌ర్షించారు. మ‌నిషి అనుకోకుండా చేసిన ఓ త‌ప్పు త‌న ప్ర‌యాణాన్ని ఎలా మార్చింద‌నే క‌థాంశంతో ఈ సినిమాను తెర‌కెక్కించారు. దీనికి పొలిటిక‌ల్ ట‌చ్ ఇచ్చారు. త‌ర్వాత ఆయ‌న డైరెక్ట్ చేసిన ‘ఆటోన‌గ‌ర్ సూర్య’ సినిమాలో మ‌నిషి ఆలోచ‌న‌తో స్వ‌తంత్య్రంగా బ‌త‌కాలి, తెలివైనోడికి ఎవ‌రి దయా దాక్షిణ్యం అక్క‌ర్లేదు అనే విష‌యాన్ని ప్ర‌స్తావించారు. త‌ర్వాత తెలుగులో ఈయ‌న చేసిన రీమేక్ మూవీ డైనమైట్ డిజాస్ట‌ర్ అయ్యింది. ఐదారేళ్ల త‌ర్వాత తెలుగులో దేవ క‌ట్టా సాయితేజ్ హీరోగా చేసిన మూవీ ‘రిప‌బ్లిక్‌’. ఇప్పటి రాజకీయ వ్య‌వ‌స్థ‌, బ్యూరోక్రాట్ సిస్ట‌మ్‌, న్యాయ‌వ్య‌వ‌స్థ ఎలా ఉండాలి. ఈ మూడు వ్య‌వ‌స్థ‌లు ఏది ఒక‌టి గాడి త‌ప్పినా స‌మాజం ఎలా ఇబ్బంది ప‌డుతుందనే విష‌యాన్ని తెలియ‌జేస్తూ రూపొందిన ‘రిప‌బ్లిక్’ ప్రేక్ష‌కుల‌ను ఎలా ఆక‌ట్టుకుందో తెలుసుకుందాం. ఈ సినిమా రిలీజ్‌కు కొన్ని రోజుల ముందు హీరో సాయితేజ్ బైక్ యాక్సిడెంట్‌లో గాయ‌ప‌డి ఆసుప‌త్రిలో చికిత్స తీసుకుంటున్నారు. ఇందులో తేజ్ ఐఏఎస్ ఆఫీస‌ర్‌గా న‌టించారు. ఈ పాత్ర‌లో ఆయ‌నెలా మెప్పించారు? రిప‌బ్లిక్ సినిమా ప్రేక్ష‌కుల‌ను ఆక‌ట్టుకుందా? లేదా? అనే విష‌యాల‌ను తెలుసుకోవాలంటే సినిమా క‌థ‌లోకి వెళ‌దాం….

క‌థ‌:
పంజా అభిరాం(సాయితేజ్‌) డిప్యూటీ క‌లెక్ట‌ర్ ద‌శ‌ర‌థ్‌(జ‌గ‌ప‌తిబాబు) కొడుకు. ఎం.ఎస్ చ‌దువుకుని అమెరికా వెళ్లాల‌నుకుంటాడు. ఎమ్మెల్యే ఎన్నిక‌ల్లో తన ఓటుని ఎవ‌రో రిగ్గింగ్ చేస్తారు. ఆ పోలింగ్‌లో ఎన్నిక‌ల‌ను ఆపాలంటూ క‌లెక్ట‌ర్ విజ‌య్‌కుమార్‌(సుబ్బ‌రాజు)తో గొడ‌వ‌ప‌డ‌తాడు అభిరాం. కానీ విజ‌య్ కుమార్‌తో మాట్లాడిన త‌ర్వాత మ‌న‌సు మార్చుకున్న అభిరాం యు.పి.ఎస్‌.సి ఎగ్జామ్స్ రాసి కలెక్ట‌ర్ అవుతాడు. విశాఖ వాణి(ర‌మ్య‌కృష్ణ‌) పార్టీ అధికారంలోకి వ‌స్తుంది. ఆమె కొడుకు విష్ణువ‌ర్ధ‌న్ ముఖ్య‌మంత్రి అవుతాడు. అధికార‌పార్టీ కావ‌డంతో రౌడీలు రాజ్య‌మేలుతుంటారు. విశాఖ వాణికి చెందిన చేప‌ల ప‌రిశ్ర‌మ కార‌ణంగా మంచి నీటి స‌రస్సు అయిన త‌ల్లేరు కాలుష్య‌మ‌వుతుంటుంది. చేప‌లు చ‌నిపోతుంటాయి. కొంద‌రు ప్ర‌జలకు నరాల జ‌బ్బులు వ‌స్తుంటాయి. దీనిపై రీసెర్చ్ చేసిన ఎన్నారై క‌నిపించ‌కుండా పోతాడు. అతని చెల్లెలు మైరా(ఐశ్వ‌ర్యా రాజేశ్‌)తో అభిరాంకు ప‌రిచ‌యం ఏర్ప‌డుతుంది. కేంద్ర ప్ర‌భుత్వం ఇచ్చిన ప్ర‌త్యేక అధికారం కార‌ణంగా అభిరాంను రాష్ట్ర ప్ర‌భుత్వం ట్రాన్స్‌ఫ‌ర్ చేయ‌డానికి వీలుప‌డ‌దు. దీంతో అభిరాం నిజాయ‌తీ గ‌ల క‌లెక్ట‌ర్‌గా త‌న బాధ్య‌త‌లు నిర్వ‌హిస్తాడు. విశాఖ వాణికి రైట్ హ్యాండ్‌లాంటి రౌడీషీట‌ర్ గుణ‌(బాక్స‌ర్ దిన‌)ను ఎన్‌కౌంట‌ర్ చేయిస్తాడు. విశాఖ వాణి చేప‌ల ప‌రిశ్ర‌మ కార‌ణంగా, క‌బ్జాకు గురై ఆత్మహ‌త్యుల చేసుకుంటున్న రైతుల స‌మ‌స్య‌తో పాటు కాలుష్య‌మ‌వుతున్న‌ త‌ల్లేరు మంచి నీటి సర‌స్సుకు వ‌చ్చిన స‌మ‌స్య‌ను ప‌రిష్క‌రించాల‌నుకుంటాడు. ఈ క్ర‌మంలో అభిరాం ఎలాంటి స‌మ‌స్య‌ల‌ను ఎదుర్కొంటాడు. చివ‌ర‌కు విశాఖ‌వాణిపై అభిరాం విజ‌యం సాధించాడా? లేదా? అనే విష‌యాల‌ను తెలుసుకోవాలంటే సినిమా చూడాల్సిందే.

విశ్లేష‌ణ‌:
మ‌న ప్ర‌జాస్వామ్య వ్య‌వ‌స్థ‌లో రాజ‌కీయ వ్య‌వ‌స్థ‌, ఎగ్జిక్యూటివ్స్‌, న్యాయ‌వ‌వ‌స్థ మూడు గుర్రాలు.. ఈ మూడు స‌క్ర‌మంగా ఉన్న‌ప్పుడే ప్ర‌జ‌ల‌కు న్యాయం జ‌రుగుతుంది. కానీ రాజ‌కీయ వ్య‌వ‌స్థ తానే బ‌ల‌వంత‌మైన వ్య‌వ‌స్థ అనుకుని మిగిలిన రెండు వ్య‌వ‌స్థ‌ల‌ను కంట్రోల్ చేయాల‌నుకోవ‌డం వ‌ల్ల వ్య‌వ‌స్థ చిన్నాభిన్న‌మైంద‌ని చెప్పే ప్ర‌య‌త్నం చేశాడు ద‌ర్శ‌కుడు దేవ క‌ట్టా. ఆయ‌న తెర‌కెక్కించిన ప్ర‌స్థానం, ఆటోన‌గ‌ర్ సూర్య చిత్రాల్లో చూపించిన పొలిటిక‌ల్ డ్రామా కంటే, రిప‌బ్లిక్ సినిమాలో పొలిటిక‌ల్ నేప‌థ్యాన్ని ఎక్కువ‌గా చూపించారు. సినిమా ప్రారంభం నుంచి చివ‌ర‌కు వ‌ర‌కు సినిమాను ఓ టెంపోలోనే తీసుకెళ్లారు.అస‌లు వ్య‌వ‌స్థ‌లో ఎక్క‌డ లోప‌ముంది అనే పాయింట్‌ను సునిశితంగా స్పృశించారు డైరెక్ట‌ర్ దేవ‌క‌ట్టా. దీనికి త‌గిన‌ట్లు ప‌వ‌ర్‌ఫుల్ డైలాగ్స్‌ను రాసుకున్నారు. ర‌మ్య‌కృష్ణ‌- సాయితేజ్ మ‌ధ్య స‌మాజం గురించి న‌డిచే స‌న్నివేశం, సాయితేజ్ కోర్టు సీన్‌, జ‌గ‌ప‌తిబాబు, సాయితేజ్ మ‌ధ్య న‌డిచే ఎమోష‌న‌ల్ ట్రాక్.. ఇలా స‌న్నివేశాలకు అనుగుణంగా రైట‌ర్‌గానూ దేవ క‌ట్టా త‌న క‌లం బ‌లాన్ని చూపించారు.

Cine Tollywood provides latest movie news, ploitical news, cinema entertainment news, latest tollywood trailers, videos, gossips and gallery in the state of Telangana, Andhra Pradesh and near by regions. Get all the latest movie updates and reviews on your favourite telugu movies. Also find more information on box office collections.